Va ularni yer yuzida jamoatlarga bo`lib yubordik. Ulardan ahli solihlari bor va ulardan unday emaslari ham bor. Shoyadki, qaytsalar deb, ularni yaxshiliklar va yomonliklar ila sinadik. A'rof 7:168 ⧉
Tafsir:
Ularni parchalab, yer yuzida guruhlarga, toifalarga boʻlib yubordik. Oralarida Allohning haqlariga-da, bandalarning haqlariga-da rioya qiladigan solihlari ham, oʻrtachalari ham, haddidan oshib, oʻziga oʻzi jabr qiladiganlari ham bor. Shoyad, gunohlardan tiyilib, haq yoʻlga qaytib qolsalar, deya ularni farovonlik bilan ham, qiyinchilik bilan ham sinadik.