Boy-badavlat bo`la turib sendan izn so`raydiganlarni ayblashga yo`l bor. Ular xotin-xalajlar bilan birga bo`lishga rozi bo`ldilar. Alloh ularning qalblariga muhr bosdi. Bas, ular bilmaslar. Tavba 9:93 ⧉
Tafsir:
Uzri bor odamlarni ayblashga yoʻl yoʻqligi bayon qilinganidan keyin kimni ayblash va jazolash mumkinligi haqida gap boradi. Ey Paygʻambar, oʻzlari boy-badavlat boʻlsa ham, jihodga chiqishga qurbi yetsa ham yana sizdan jangdan qolishga ruxsat soʻraganlarni ayblash va jazolashga yoʻl bor. Ular oʻzlari xorlikka rozi boʻlib, uylarida xotin-xalajlar bilan qoldilar. Alloh ularning qalblarini muhrlab qoʻydi. Endi ularga nasihat kor qilmaydi. Endi ular oʻzlariga nima foyda, nima ziyon, ajrata olmaydilar.