Sizga yaxshilik tegsa, ularga yomon bo`ladir. Sizlarga musiybat yetsa, ular xursand bo`larlar. Agar sabr va taqvo qilsangiz, ularning makri sizga hech zarar qilmas. Albatta, Alloh qilayotgan ishlarini ihota qilguvchidir. Oli Imron 3:120 ⧉
Tafsir:
Ey moʻminlar, dushman ustidan gʻalaba, farzand koʻrish yoki mol-davlat kabi biron nematga erishsangizlar, ular xafa boʻlib, gʻam-gʻussaga botadilar. Dushmandan magʻlub boʻlish farzand dogʻi yoki mol-davlatdan ayrilish kabi biron musibatga yoʻliqsangizlar, ular xursand boʻlib, yayrab ketadilar. Allohning gʻazabidan qoʻrqib, farmonlari va qadarlariga sabr qilsangizlar, ularning ozorlari ham, makru nayranglari ham sizlarga zarar yetkaza olmaydi. Alloh ularning qilayotgan nayranglaridan ogoh turibdi va yaqinda oʻsha nayranglarini ish bermaydigan qilib qoʻyadi.