Alloh kitob berilganlardan, uni odamlarga albatta bayon qilursiz va berkitmassiz, deb ahd olganini esla. Bas, uni ortlariga qaratib otdilar va arzon narxga sotdilar. Sotib olgan narsalari qanday ham yomon! Oli Imron 3:187 ⧉
Tafsir:
Ey Paygʻambar alayhissalom, eslang! Alloh ahli kitob - yahud va nasorolarning olimlaridan, Allohning kitobini odamlarga haq bilan bayon qilasizlar, uning ichidagi hidoyatni va Muhammad alayhissalomning paygʻambarligi haqidagi xabarni yashirmaysizlar, deb ahdu paymon olgan edi. Ular esa bu ahdu paymonni nazar-pisand qilmasdan, ortlariga otdilar, haqiqatni yashirib, botilni haq qilib koʻrsatdilar, Allohga bergan ahdlarini mol-davlat va obroʻ kabi arzon narxga sotdilar. Sotib olgan narsalari naqadar yomon!