Albatta, molu jonda sinovga uchraysiz. Albatta, sizdan oldin kitob berilganlardan va shirk keltirganlardan ko`plab ozor eshitasiz. Agar sabr qilsangiz va taqvo qilsangiz, albatta, bu salmoqli ishlardandir. Oli Imron 3:186 ⧉
Tafsir:
Ey moʻminlar, molu davlatingiz borasida unga oid vojiblarni bajarish va musibatlar yetishi bilan sinalasizlar. Joningiz borasida esa shariat talablarini bajarish va ustingizga tushadigan turli baloyu ofatlar bilan imtihon qilinasizlar. Sizlardan oldingi kitob berilganlardan ham, shirk keltirganlardan ham oʻzingizga va diningizga tanayu dashnomlar otish kabi koʻp ozorlarga uchraysizlar. Bu baloyu musibatlarga sabr qilib, Allohdan buyruqlarini bajarish va taqiqlaridan tiyilish bilan taqvo qilsangizlar, bu ishingiz orzu-havas qilishga, unga yetish yoʻlida bellashishga arziydigan ish boʻladi.