Odamlardan yashirarlar va Allohdan yashira olmaslar. Holbuki, U O`zi rozi bo`lmaydigan gapni xufyona kelishayotganlarida ham ular ila birgadir. Va Alloh ular qilayotgan amallarni ihota qiluvchi Zotdir. An-Nisa 4:108 ⧉
Tafsir:
Jinoyatlarini qoʻrqqanlaridan va uyalganlaridan odamlardan yashiradilar. Allohdan esa yashirmaydilar. Alloh har doim ular bilan birgadir. Ularni ihota qilib turadi. Jinoyatchining yonini olish va begunohga qora chaplash kabi Alloh rozi boʻlmaydigan ishlarni xufyona tuzayotganlarida ham hammasidan xabardor boʻlib turadi. Alloh ularning ichidayu tashida qilayotgan hamma ishlarini qamrab olgandir. Biron narsa U Zotdan yashirin qolmaydi. Yaqinda amallariga yarasha jazo yoki mukofotlarini beradi.