Albatta, munofiqlar Allohni aldamoqchi bo`lurlar. Holbuki, Alloh ularni «aldovchi»dir. Agar namozga tursalar, dangasalik bilan, xo`jako`rsinga tururlar va Allohni kamdan-kam zikr qilurlar. An-Nisa 4:142 ⧉
Tafsir:
Munofiqlar oʻzlarini musulmon qilib koʻrsatib, kufrini yashirib, Allohni aldamoqchi boʻladilar. Allohning Oʻzi ularni aldab qoʻyibdi. Chunki U Zot ularning kofirligini bilib turib ham jonlarini asrab turibdi. Oxiratda esa ularga eng ogʻir azobni tayyorlab qoʻygan. Ular namozga tursalar, erinib, yoqtirmasdan, ixlossiz, xoʻjakoʻrsinga turadilar. Allohni kamdan-kam, moʻminlarga yoʻliqqan paytlaridagina yodga oladilar.