U — Alloh Undan o`zga iloh yo`q Zotdir. U — Malik, U — Quddus, U — Salom, U — Mu'min, U — Muhaymin, U — Aziyz, U — Jabbor, U — Mutakabbirdir. Alloh ular shirk keltirayotgan narsalardan pokdir. Hashr 59:23 ⧉
Tafsir:
U Allohdirki, Undan oʻzga chin mabud yoʻqdir. Gʻaybni ham, hozirni ham Bilguvchidir. Biron narsa U Zotdan yashirin qolmas. U Zot dunyo va oxiratning Rahmoni va Rahimidir. U Zotning rahmati butun olamlarni qamrab olgandir. Podshohdir. Quddusdir, har qanday nuqsondan pokdir. Salomdir, har qanday aybdan salomatdir. Moʻmindir, elchilarini yorqin hujjatlar bilan tasdiqlaguvchidir. Muhaymindir, bandalarining amallarini kuzatib turguvchidir. Azizdir, hammadan Gʻolibdir. Jabbordir, Oʻz qahri ila hamma narsani egallab olgandir. Mutakabbirdir. Alloh mushriklar keltirayotgan shirklardan, butlaru boshqa narsalardan Pok va Oliydir.