Ularni o`n ikki urug` — jamoaga bo`lib yubordik. Va qavmi undan suv talab qilgan paytda Musoga: «Asoing ila toshni ur!» deb vahiy yubordik. U(tosh)dan o`n ikkita buloq otilib chiqdi. Hamma odamlar o`z suvxonasini bildi. Va ularga bulutni soyabon qildik, mann va bedanalarni nozil qildik. «Sizlarga rizq qilib bergan narsalarimizning poklarini yenglar» (dedik). Ular Bizga zulm qilmadilar. Lekin o`zlariga zulm qilar edilar. Al-A'raf 7:160 ⧉
Tafsir:
Bani Isroilni oʻn ikki qabilaga ajratdik. Musoga qavmi undan Allohdan suv soʻrab berishini soʻraganlarida: "Ey Muso, asoingni toshga ur", dedik va Muso urgan edi, undan oʻn ikki buloq otilib chiqdi. Har bir qabilaga bittadan buloq boʻlib, hammasi oʻzi ichadigan joyini, bulogʻini bildi. Biri ichadigan joyga boshqasi kelmadi. Ularga bulutni soyabon qildik. Yursalar, bulut ham yurdi, toʻxtasalar, toʻxtadi. Ularga shirinliklar va bedana kabi qushlarni yogʻdirib: "Biz sizlarga rizq qilib bergan pokiza nematlardan tanovul qilinglar", dedik. Ularning kufri, zulmi va haqni tan olmasligi Bizga hech qanday zarar qilgani yoʻq. Lekin ular Allohning nematlariga nonkoʻrlik qilib, buyruqlariga itoat etmay, oʻzlariga oʻzlari jabr qildilar, oʻzlarini oʻzlari halokat chohiga otdilar.