Ular: «Ey Robbimiz, safarlarimiz orasini uzoq qil!» dedilar va o`zlariga zulm qildilar. Bas, Biz ularni hikoyalarga aylantirdik va butunlay parcha-parcha qilib tashladik. Albatta, bunda har bir o`ta sabrli va o`ta shukrli uchun oyat (belgi)lar bordir. Saba 34:19 ⧉
Tafsir:
Alloh ularga yoʻllarini yaqin qilib bersa, hadlaridan oshib, toʻqlikka shoʻxlik qilib: "Parvardigoro, oʻrtadagi qishloqlarni olib tashlab, safarlarimizni uzoq qilib ber, toki, safar mashaqqatini tatiylik, karvonlarimizning fazilati koʻrinsin", deya duo qilib, oʻzlariga oʻzlari zulm qildilar. Nonkoʻrlik, noshukrlik va hasad ularni shu ahvolga soldi. Shu bilan ularni keyingilar gapirib yuradigan choʻpchaklarga aylantirib qoʻydik. Parcha-parcha qilib, bir-birlari bilan bordi-keldi qila olmaydigan qilib yubordik. Bu ishlarda Allohga itoat qilish va U Zotga gunoh qilib qoʻyishdan tiyilish yoʻlida sabr qiladigan, Allohning nematlariga shukr qiladigan zotlar uchun ibrat bordir.