Sizlarga sirli suhbatingizdan avval sadaqa berish og`ir keldimi? Agar (buyruqni) bajarmasangiz, (mayli) Alloh afv qildi. Bas, namoz o`qingiz va zakot beringiz. Va Allohga va Uning Payg`ambariga itoat qilingiz. Alloh qilayotgan ishlaringizdan xabardordir. Al-Mujadila 58:13 ⧉
Tafsir:
”Paygʻambar alayhissalom bilan suhbatlashishdan oldin sadaqa bersak, kambagʻal boʻlib qolamiz”,- deb qoʻrqdinglarmi?! Bu buyruqni bajarmagan boʻlsangizlar ham Alloh taolo sizlarni kechirdi. Chunki U Zot buni qilmaslikka Oʻzi ruxsat bergan. Endi taqvo qilib, namozni toʻla-toʻkis ado qilinglar, mollaringizning zakotini beringlar, Alloh va Rasuliga itoat etinglar. Alloh taolo barcha ishlaringizdan xabardordir. Amallaringizdan biron narsa U Zotdan maxfiy qolmas. Sizlarga yaqinda amallaringizga yarasha jazo yoki mukofot berur.