اور آیت میں مِنْ أَهْلِ الْقُرَىٰ یوسف ۱۲:۱۰۹ ⧉ کا لفظ بھی فرمایا یعنی ” وہ رسول بھی زمین کے باشندے تھے، آ سمان کی مخلوق نہ تھے “۔
سیدنا ابن عباس رضی اللہ عنہما فرماتے ہیں ” مراد اہل ذکر سے اہل کتاب ہیں۔“ مجاہد رحمتہ اللہ علیہ اور اعمش رحمتہ اللہ علیہ کا قول بھی یہی ہے۔ عبدالرحمٰن رحمتہ اللہ علیہ فرماتے ہیں ” ذکر سے مراد قرآن ہے۔“ جیسے آیت اِنَّا نَحْنُ نَزَّلْنَا الذِّكْرَ وَاِنَّا لَهٗ لَحٰفِظُوْنَ الحجر ۱۵:۹ ⧉ میں ہے یہ قول بجائے خود ٹھیک ہے لیکن اس آیت میں ذکر سے مراد قرآن لینا درست نہیں کیونکہ قرآن کے تو وہ لوگ منکر تھے۔ پھر قرآن والوں سے پوچھ کر ان کی تشفی کیسے ہو سکتی تھی؟ اسی طرح ابو جعفر باقر رحمۃ اللہ تعالیٰ عنہ سے مروی ہے کہ ” ہم اہل ذکر ہیں“ یعنی یہ امت یہ قول بھی اپنی جگہ ہے۔ درست ہے فی الواقع یہ امت تمام اگلی امتوں سے زیادہ علم والی ہے اور اہل بیت کے علماء اور علماء سے بدر جہا بڑھ کر ہیں۔ جب کہ وہ سنت مستقیمہ پر ثابت قدم ہوں۔ جیسے علی، ابن عباس، حسن، حسین، رضی اللہ عنہم محمد بن حنفیہ، علی بن حسین، زین العابدین، علی بن عبداللہ بن عباس، ابو جعفر باقر، محمد بن علی بن حسین اور ان کے صاحبزادے جعفر رحمہ اللہ اور ان جیسے اور بزرگ حضرات رحمہ اللہ علیہم۔ اللہ کی رحمت و رضا انہیں حاصل ہو۔ جو کہ اللہ کی رسی کو مضبوط تھامے ہوئے اور صراط مستقیم پر قدم جمائے ہوئے اور ہر حقدار کے حق بجا لانے والے اور ہر ایک کو اس کی سچی جگہ اتارنے والے، ہر ایک کی قدر و عزت کرنے والے تھے اور خود وہ اللہ کے تمام نیک بندوں کے دلوں میں اپنی مقبولیت رکھتے ہیں۔ یہ بیشک صحیح تو ہے لیکن اس آیت میں یہ مراد نہیں۔ یہاں بیان ہو رہا ہے کہ ” آپ ﷺ بھی انسان ہیں اور آپ ﷺ سے پہلے بھی انبیاء بنی آدم میں سے ہوتے رہے “۔ جیسے فرمان ہے آیتأَوْ يَكُونَ لَكَ بَيْتٌ مِّن زُخْرُفٍ أَوْ تَرْقَىٰ فِي السَّمَاءِ وَلَن نُّؤْمِنَ لِرُقِيِّكَ حَتَّىٰ تُنَزِّلَ عَلَيْنَا كِتَابًا نَّقْرَؤُهُ قُلْ سُبْحَانَ رَبِّي هَلْ كُنتُ إِلَّا بَشَرًا رَّسُولًا وَمَا مَنَعَ النَّاسَ أَن يُؤْمِنُوا إِذْ جَاءَهُمُ الْهُدَىٰ إِلَّا أَن قَالُوا أَبَعَثَ اللَّـهُ بَشَرًا رَّسُولًا
الاسراء ۱۷: ۹۳⧉ ۹۴⧉ الخ ” کہہ دے کہ میرا رب پاک ہے میں صرف ایک انسان ہوں جو اللہ کا رسول ہوں۔ لوگ محض یہ بہانہ کر کے رسولوں کا انکار کر بیٹھے کہ کیسے ممکن ہے کہ اللہ تعالیٰ کسی انسان کو اپنی رسالت دے “۔ اور آیت میں ہے وَمَا أَرْسَلْنَا قَبْلَكَ مِنَ الْمُرْسَلِينَ إِلَّا إِنَّهُمْ لَيَأْكُلُونَ الطَّعَامَ وَيَمْشُونَ فِي الْأَسْوَاقِ الفرقان ۲۵:۲۰ ⧉ ” تجھ سے پہلے جتنے رسول ہم نے بھیجے سبھی کھانے پینے اور بازاروں میں چلنے پھرنے والے تھے “۔ اور آیت میں ہے وَمَا جَعَلْنَاهُمْ جَسَدًا لَّا يَأْكُلُونَ الطَّعَامَ وَمَا كَانُوا خَالِدِينَ الانبیاء ۲۱:۸ ⧉ ” ہم نے ان کے جسم ایسے نہیں بنائے تھے کہ وہ کھانے پینے سے بے نیاز ہوں یا یہ کہ مرنے والے ہی نہ ہوں “۔اور جگہ ارشاد ہے آیت قُلْ مَا كُنْتُ بِدْعًا مِّنَ الرُّسُلِ وَمَآ اَدْرِيْ مَا يُفْعَلُ بِيْ وَلَا بِكُمْ الأحقاف ۴۶:۹ ⧉ ” میں کوئی شروع کا اور پہلا اور نیا رسول تو نہیں؟ “
ایک اور آیت میں ہے قُلْ إِنَّمَا أَنَا بَشَرٌ مِّثْلُكُمْ يُوحَىٰ إِلَيَّ أَنَّمَا إِلَـٰهُكُمْ إِلَـٰهٌ وَاحِدٌ الکہف ۱۸:۱۱۰ ⧉ ” میں تم جیسا انسان ہوں میری جانب وحی اتاری جاتی ہے “ الخ۔ پس یہاں بھی ارشاد ہوا کہ ” پہلی کتابوں والوں سے پوچھ لو کہ نبی انسان ہوتے تھے یا غیر انسان؟ “ پھر یہاں فرماتا ہے کہ ” رسول کو وہ دلیلیں دے کر حجتیں عطا فرما کر بھیجتا ہے کتابیں ان پر نازل فرماتا ہے صحیفے انہیں عطا فرماتا ہے “۔ زُّبُرِ سے مراد کتابیں ہیں۔ جیسے قرآن میں اور جگہ ہے وَكُلُّ شَيْءٍ فَعَلُوهُ فِي الزُّبُرِ القمر ۵۴:۵۲ ⧉ ” جو کچھ انہوں نے کیا کتابوں میں ہے “۔ اور آیت میں ہے وَلَقَدْ كَتَبْنَا فِي الزَّبُورِ الانبیاء ۲۱:۱۰۵ ⧉ ” ہم نے زبور میں لکھ دیا “ الخ۔ پھر فرماتا ہے ” ہم نے تیری طرف ذکر نازل فرمایا “ یعنی قرآن اس لیے کہ چونکہ تو اس کے معنی مطلب سے اچھی طرح واقف ہے اسے لوگوں کو سمجھا بجھا دے۔ حقیقتاً اے نبی آپ ﷺ ہی اس پر سب سے زیادہ حریص ہیں آپ ﷺ ہی اس کے سب سے بڑے عالم ہیں اور آپ ﷺ ہی اس کے سب سے زیادہ عامل ہیں۔ اس لیے کہ آپ ﷺ افضل الخلائق ہیں، اولاد آدم کے سردار ہیں۔جو اجمال اس کتاب میں ہے اس کی تفصیل آپ ﷺ کے ذمے ہے، لوگوں پر جو مشکل ہو آپ ﷺ اسے سمجھا دیں تاکہ وہ سوچیں سمجھیں راہ پائیں اور پھر نجات اور دونوں جہاں کی بھلائی حاصل کریں۔