Ular gapirmaganlari haqida Allohning nomi ila qasam icharlar. Batahqiq, kufr kalimasini aytdilar va Islomlaridan keyin kufr keltirdilar hamda yeta olmagan narsalariga qasd qildilar. Holbuki, ular Alloh va Uning Rasuli ularni O`z fazlidan boy qilib qo`yganlaridan boshqa «ayb» topa olmadilar. Agar tavba qilsalar, o`zlariga yaxshi bo`ladir. Gar yuz o`girib ketsalar, Alloh ularni bu dunyoyu oxiratda alamli azob bilan azoblaydir. Yer yuzida ularga do`st ham, yordamchi ham yo`q. At-Tawbah 9:74 ⧉
Tafsir:
Munofiqlar sizni haqorat qilib, ayblab aytgan gaplarini aytmadik, deya yolgʻon qasam ichadilar. Holbuki, kofirga aylantiradigan soʻzni aniq aytib, oldin musulmonligini izhor qilgan boʻlsalar, keyin kofirligini ham oshkor qilgandilar hamda oʻzlari yetolmagan narsaga, yani, Paygʻambar alayhissalomni oʻldirishga qasd qilgandilar. Bu bilan ular inkor qilib boʻlmas faktni inkor qilmoqdalar. Yani, ularni Alloh Oʻz fazlu karami ila Paygʻambariga ato etgan oʻljalar bilan boy qilgandi. Ular esa xuddi shu sababli Alloh va Paygʻambarini yomon koʻrdilar. Endi munofiqliklaridan tavba qilsalar, oʻzlari uchun yaxshi boʻlur. Yuz oʻgirsalar, Alloh ularni shu dunyoda ham, oxiratda ham juda qattiq azoblaydi. Bu dunyoda oʻldiriladilar, asir olinadilar, oxiratda esa doʻzax chohiga qulaydilar. Ularni azobdan qutqaradigan, himoya qiladigan biron doʻst va yordamchi topilmas.