Ular: «Alloh farzand tutdi», derlar. U pokdir. Albatta osmonlaru yerdagi barcha narsalar Unikidir. Hamma Unga bo`ysunuvchidir. Al-Baqarah 2:116 ⧉
Tafsir:
Yahudlar ham, nasorolar ham, mushriklar ham, Allohning bolasi bor, deyishadi. Alloh bunday nuqsondan pok Zot. U maxluqotlaridan behojat. Farzand tutish esa bolaga muhtojning ishi. Osmonlaru yerdagi barcha narsa Uning mulki. Hamma xaloyiq U zotning boʻysunuvchi bandalari. Ularni Oʻzi istaganidek tasarruf qiladi.