Va Uning oyat-belgilaridan sizga O`z rahmatidan tottirish uchun, O`z amri ila kemalarni yurdirish uchun va Uning fazlidan (rizq) talab qilishingiz uchun shamollarni xushxabarchi qilib yuborishidir. Shoyadki, shukr qilsangiz. Ar-Rum 30:46 ⧉
Tafsir:
Allohning qudrati va yagonaligiga dalolat qiluvchi oyatlardan yana biri shuki, shamollarni yomgʻir yogʻishidan xushxabar olib keluvchi qilib yubordi. Oʻz rahmati ila yomgʻirdan keyin moʻl-koʻl hosil ato etib, undan sizlarni bahramand qilish uchun, dengizlarda kemalar U Zotning irodasi ila yurishi uchun, U Zotning fazlidan umidvor boʻlib, dengizlarda savdo safarlarini qilishingiz uchun shunday qildi. Shoyadki, Allohning nematlariga shukr qilsangizlar va U Zot sizlarga yanada koʻpaytirib bersa.